Sarvu Vitali e la vuci di Radiu Aut
Sugnu n’arma o forsi n’ummira
cà camina strata strata
sugnu nta l’aria, nta lu ventu,
quannu sbrizzìa
quannu sbapura ciauru di terra vagnata,
ti staiju sempri d’allatu
e nun ti lassu mai sulu
tu nun mi viri, ma spissu
mi mettu a braccettu di tìa
ti fazzu na carizza,
ti mettu la manu ‘n capu la spadda,
e ‘mmucca ‘mmucca ti taliu priatu,
quannu parri di mìa.
Jo nun sugnu cchiù fattu di carni,
ma tu Sarvu, mi teni vivu
porti avanti lu mè nomi,
parri sempri di me matri,
pirdunami, nostra matri!
Nun s’avi aviri pì forza lu stessu sangu
p’essiri frati!
Centu passi e la me luci
cuntinui a diffunniri cu à tò vuci.
Quanti cosi avissimu pututu fari ‘nsemmula,
ah frati meu, s’avissi statu ancora vivu,
ma tu hai fattu puru pì mìa e chissu m’abbasta!
Pì cu nun mi canusci,
pì cu fa finta di nun sapiri
sugnu sempri io,
la vuci viva di Radiu Aut
Pippinu di nomu e ‘Mpastatu di cugnomi,
l’amicu di Sarvu Vitali,
lu figghiu di Filicia
chidda ca grirava e addumannava Giustizzìa,
lu cinisaru nimicu di dda lurdìa
purtroppu ancora prisenti
ca tutti cuntinuanu a chiamari mafia!
9.5.2015 Francesco Billeci
Nella foto in basso Salvo Vitale a Radio Aut (1978)